«Esan osteko eta aldibereko interpretazio praktikak» ikastaroaren kronika - 2018

«Esan osteko eta aldibereko interpretazio praktikak» ikastaroa antolatu zuen EIZIEk urriaren 18an, 22an eta 25ean, Gasteizko Letren Fakultateko interpretazio laborategietan (EHU). Hiru saiotan, esan osteko eta aldibereko interpretazioan jardun zuten ikasleek, Jaione Arregi irakaslearekin.

Lehen egunean, eta aurkezpenen ondoren, zuzenean ekin zioten gaiari parte-hartzaileek, eta esan ostekoa lantzen hasi ziren. Interpretazio mota horren nondik norakoak azaldu zituen aurrena irakasleak, baina ez zen gehiegi sakondu alde teorikoan, ezagutzen baitzuten ikasle gehienek. Interpretatzen hasi aurretik, hainbat ariketa egin zituzten, birformulazioa, entzumen aktiboa eta analisia lantzeko. Bukatzeko, pare bat hitzaldi interpretatu zituzten esan ostekoan, EU-ES eta ES-EU norabideetan.

Bigarren egunean, zati bat esan ostekoari eskeini zitzaion, eta, beste hitzaldi batzuen artean, ikasleetako batek etxean prestaturiko bat interpretatu zuten. Ondoren, aldibereko interpretaziora pasatu ziren. Hasieran, aurreko saioetan erabilitako diskurtso laburrak errepikatu zituzten. Helburua aldiberekoaren teknikan sartzea zen, eta ikasleek nolabait beren maila neurtzea: zer arazo zeuzkaten eta zergatik. Hainbat estrategia eta teknikari buruz aritu zen irakaslea, eta ikasleek beren artean baloratu zituzten egindako interpretazioak, edukia, forma eta aurkezpena kontuan hartuta. Egindako ariketez gain, nork bere kasa lan egiteko irizpide eta jarraibideak aurkeztu zituen irakasleak.

Hirugarren saioan, aldiberekoarekin jarraitu zuten, gai desberdinetako hitzaldiak oinarri harturik. Interpretazio-saioak entzun eta baloratu zituen irakasleak, ikasleen beren balorazioak ere kontuan harturik. Sortu ziren arazoei nola aurre egin azaldu zuen, interpretazioa lantzeko jarraibide batzuk emateaz batera.