Konferentzia-interpreteen Nazioarteko Eguna

Gaur, azaroaren 20a, Konferentzia-interpreteen Nazioarteko Eguna da: zorionak interprete-lanetan aritzen zareten guztioi!

Iaz egin genuen bezala, aurten ere fokuetatik urrun geratu ohi diren interpreteak ekarri nahi izan ditugu gogora, egiten duten lana ezinbestekoa baita. UNESCOren Hizkuntza Indigenen Hamarraldian (2022-2032) sartu berri garen honetan, Lurdes Auzmendik SENEZ aldizkarian argitaratutako «Interpretazio beharra lurralde indigenetan» artikulua ekarri dizuegu.

Ildo beretik, aurki izango da Garabidek eta EHUko Letren Fakultateak hizkuntza gutxituetako itzulpengintza eta interpretazioari buruz antolatu duten topaketa birtuala (hilaren 22an eta 23an).

Helburua euskararen eta komunitate indigenen esperientziak ezagutu eta biltzea da; izan ere, haiek ere asko ematen diote euskarari eta euskal gizarteari, Lurdes Auzmendik berak azpimarratzen duen bezala:

(…) haiek guri lezio asko ematen dizkigute bueltan. Lehenengoa, apaltasuna, gurean sarritan hazten dugun balioa, eta hortik aurrera ez ahaztea gure prozesua nolakoa izan zen, zenbat kostatu zaigun gaudenera iristea, eta partekatuz beti dela bidea ibiltzen errazagoa.

Jarrai dezagun, beraz, elkarrekin bidea urratzen eta hizkuntza gutxituetako hiztunen eskubideen alde egiten.

(Irudia: Jon Endow, Pie de Página webgunetik)