Vitoria-Gasteiz sarien 2025eko deialdia argitaratu da

Haur eta Gazte Literaturaren alorrean euskarara egindako itzulpenik onenak sarituko dira.

Vitoria-Gasteiz itzulpen sarien 2025eko deialdia eta oinarriak argitaratu ditu Gasteizko Udalak, ALHAOn (Arabako Lurralde Historikoaren Aldizkari Ofizialean).

Sari bana emango da, bi sail hauetan:

• Haur literatura (6-12 urte), diploma, zurez eta arbelez eskuz landutako garaikurra eta 9.000 euro.
• Gazte literatura (13-18 urte), diploma, zurez eta arbelez eskuz landutako garaikurra eta 9.000 euro.

Aurkezteko betebeharrak

1. Edozein hizkuntzatatik euskarara egindako haur eta gazte literaturaren alorreko itzulpenekin —2024. urteko legezko gordailua dutenak— lehiatu ahal izango da Vitoria-Gasteiz sarietarako.
2. Itzulpena egin eta argitaratzeko eskatzen diren lege-betekizun guztiak beteta izan beharko dituzte lehiaketara aurkezten diren lanek.
3. 2024. urtekoa izan beharko du legezko gordailuaren datak.
4. 2025eko deialdi honetara ezingo dira sail bereko lehiaketara aurkeztu 2023an edo 2024an sail horretan sarituak izan ziren itzultzaileak.
5. Sari hauek bateragarriak dira bai beste erakunde batzuek ematen dituztenekin, bai liburuak itzultzeko jasotako dirulaguntzekin.
6. Ez da onartuko enpresek egindako itzulpen-lanik.

Aurkezteko eta izapideak egiteko epea

2025eko maiatzaren 2an amaituko da epea.