Lanean ari dira Quebeceko «Itzultzaile Berriak»
Iaz ekin zioten EIZIEk eta Etxepare Euskal Institutuak «Itzultzaile Berriak» programaren edizio berriari.
Yannick Bédard eta Michel Usereau itzultzaile quebectarrak Aiora Jaka EIZIEko kidearen gidaritzapean ari dira hiru idazleren lanak itzultzen, horretarako sorturiko mentoretza baten bidez.
Saison Québec – Pays Basque 2021-2022 egitasmoaren baitan ari dira lanean. Nazioarteko literatura itzultzaileak euskaraz trebatzea eta nazioarteko literatura itzultzaileen eta bertakoen arteko zubiak eraikitzea da egitasmoaren xedea, bereziki frankofoniari eskainia edizio honetan.
Hiru idazleren bina lagin frantseseratuko dituzte urte amaiera bitartean: Garazi Arrularen ‘Abian’ eta ‘Ederra eta piztia’; Uxue Alberdiren ‘Oreina’ eta ‘Ezertan lagun diezazuket?’; eta Harkaitz Canoren ‘Arrokarik altuena’ eta ‘Safaria’. Itzulpen prozesuan, idazleekin ere jardungo dute itzultzaileek modu telematikoan, EIZIEk antolaturiko lansaioetan.
Ondoren, Bilboko Gutun zuria jaialdian aurkeztuko dute lanaren emaitza. Gainera, aurreikusita dago itzultzaileek egonaldia egitea, 2022an, Euskal Herrian.
Beste zenbait ekimen ere aurkeztu ditu Etxepare Euskal Institutuak:
«Besteen ahotsa / La voix des autres» kongresua kongresua (online), urriaren 13an eta 14an. ’Eleaniztasuna eta literatura: Euskal Herria eta Quebec' lemapean parte hartuko dute, besteak beste, Elizabete Manterolak, Xabi Payak eta Amets Arzallusek. Laval Unibertsitatea, Etxepare Euskal Institutua, Quebeceko PEN kluba eta Euskal PEN kluba dira ekimenaren sustatzaileak.
‘Québec en toutes lettres’ jaialdi entzutetsuan, berriz, 'Soirée découverte Accent basque’ izenburupean antolatu dira honako hauek:
- Euskal literaturari buruzko mahai-inguru bat. Bertan, Itxaro Borda eta Kirmen Uribe idazleak eta Irene Larraza Etxepareko zuzendariak parte hartuko dute, Mélissa Verrault idazle eta itzultzailearen gidaritzapean.
- ‘Chejov vs. Shakespeare’ egitasmoaren aurkezpena egingo da. Aurelia Arkotxa euskal idazlea eta Jean Désy idazle quebectarra izan dira protagonistak oraingo honetan, eta urtebeteko gutun-trukearen emaitza liburu bihurtu eta jaialdi horretan aurkeztuko da.
Bestalde, ‘Poesiaren gaua’ ekitaldian parte hartuko du Itxaro Bordak urriaren 23an.
