'Lisboako setioaren historia' berrargitaratu da

Urrezko Biblioteka bilduman dugu orain Saramagoren liburua, Jon Alonso Fourcadek itzulia.

Literatura Unibertsala bilduman argitaratu zen Jon Alonsoren itzulpena lehen aldiz, duela hogei urte. Testua eguneraturik dator orain, Urrezko Biblioteka bilduman (Elkar, 2019).

Lisboako setioaren historia

Raimundo Silva, adinean sartuxea dagoen testu-zuzentzaile lisboarra, mutilzahar metodiko eta bizimodu aspergarria daramana, egun batez, Lisboako setioari buruzko liburu bat zuzentzen ari dela, bera betebeharrari itzuriko zaio eta «bai» jarri behar zuen lekuan «ez» idatziko du. Transgresio txiki horrek Portugaleko Historia aldatzen du, baina baita Raimundo Silvaren beraren historia ere, gizon apal eta grisa zena behingoz bere patuaren subjektu bihurtuko baita, erabakimenaren jabe eta bere geroaren egile.

Gizatasunari, historiari, fikzioari eta maitasunari buruzko gogoeta mamitsuez gain, ohargarria da Saramagoren idazkera berezia, bere sintaxi landu, konplexu eta jostalariak gai batetik bestera, garai batetik bestera baitarama irakurlea, bide bihurri eta sigi-sagatsuetan barrena.