Euskarazko interpreteen egoera: diagnostikoa egiteko inkesta bat zabaldu du EIZIEk

Euskaratik edo euskarara lan egiten duten interpreteen egoera aztertzea du helburu inkestak.

Gaur gaurkoz, oso informazio gutxi dugu euskarazko interpreteei buruz, ez baita informazio-bilketa sistematizaturik egin.

Profesional horien egoeraren eta kezken berri jaso, eta elkartearen xedeetako bati erantzun nahi dio diagnostiko horrek: lanbidearen errealitatea ezagutzea eta, hortik abiatuta, lan-baldintzak hobetzen eta aldarrikatzen laguntzea, baita hautematen diren balizko arazoei aurre egitea ere.

Lantalde bat sortu da horretarako EIZIEren baitan, eta galdetegi bat prestatu du, euskaratik eta/edo euskarara lan egiten duten interprete guztiei zuzendua, EIZIEko bazkide izan zein ez.

Galdetegia uztailaren 1era arte egongo da zabalik, eta ahalik eta erantzun gehien jasotzea da helburua, lanbidearen ertz guztiak ezagutu ahal izateko.

Interpretea bazara, gustura jasoko dugu zure berri HEMEN.

Ikus, baita ere, Claudia Torralba Rubinosen artikulua 31 eskutik blogean: «Interpreteen lan-baldintzen diagnostikorako bidean aurrera»