Claudia Torralba bazkideak aldibereko interpretazioaren inguruko tesi bat aurkeztu du

Joan den ostiralean, apirilaren 26an, Claudia Torralba Rubinosek “Aldibereko interpretazioa eta Eusko Legebiltzarreko diskurtsoa: enuntziatu parentetikoen eta modalizazioaren azterketa corpus elebidun eta hirukoitz batean” izenburuko doktore-tesia defendatu zuen, Gasteizen, UPV/EHUko Letren Fakultatean.

Zehazki, aldibereko interpretazioa testuarekin izeneko interpretazio-modalitatea izan du aztergai Torralba-Rubinosek, eta Eusko Legebiltzarreko interpreteen jardun errealak bilduta sortu duen corpusa erabili du azterketa egiteko. Nazioarteko tesia izanik, ingelesez eta euskaraz aurkeztu du.

Epaimahaiak hiru kide izan ditu: Jon Casenave (epaimahaiburua), Leire Diaz de Guereñu Lasaga (idazkaria) eta Carmen Toledano Buendía (kidea). Tesia Ines García-Azkoaga doktoreak zuzendu du.

Epaimahaikideek bereziki nabarmendu nahi izan dute tesia bide-urratzaile dela zentzu askotan, eta ekarpen handia egin diela bai euskal ikasketei, bai itzulpengintza eta interpretazioaren arloko ikasketei.