'31 eskutik' blogak jasoko du GetxoBlog SU saria

Azaroaren 30ean jasoko du saria Aitor Blanco Leozek, GetxoBlog topaketan.

GetxoBlog topaketaren XVI. edizioa egingo dute aurten, BiscayTik Fundazioan, azaroaren 30ean. Jardunaldiaren baitan, sari-banaketa ere izango da, eta Aitor Blanco Leozek hartuko du sariaren garaikurra, bera baita gaur egun 31 eskutik EIZIEren blogaren koordinatzailea eta editorea. Streaming bidez ere ikusi ahal izango da ekitaldia.

31 eskutik, 2012an sortua, euskarari buruz aritzeko talde-blog bat da. Alor askotako 31 «eskuk» idazten dute, txandaka, eskuzabaltasun osoz, helburu hartuta ekarpenak egitea, gogoeta eta proposamenei zabalkundea ematea eta elkarrizketa sortzea.

Bost sari ematen ditu GetxoBlogek, eta SU sariaz gainera, HAREA saria, UR saria, AIRE saria eta ETER saria banatuko dituzte.

Ikus jardunaldiari buruzko informazio guztia hemen.

Zorionak, beraz, artikulugile guztioi!