Itzultzaileak Literaturian

Laster dator Literaturia 2012 Larrabetzura. Ekainaren 3ko mahai-inguruan, itzulpena izango da hizpide, EIZIEk antolatutako ekitaldian.

Literaturiako programaren baitan izango da EIZIE Larrabetzun. Izan ere, ekainaren 3an, igandea, 10:00etatik 11:30era bitartean izango den mahai-ingurua antolatu dugu:

«Idazlearen eta irakurlearen artean, itzultzailearen itzala»

• Unai Elorriaga
• Iban Zaldua
• Iñigo Roque
• Xabier Mendiguren Elizegi
• Moderatzailea: Miren Ibarluzea (EIZIE)

Gisa honetako kontuak izango ditugu gogoetagai:

• Nola egiten dira itzulgaien/itzulpen-irakurketetarako hautuak? Zeren mende gaude?
• Berdin saltzen al dira itzulpenak eta euskaraz sortutako lanak?
• Idazle bat itzultzaile aritzeak ematen al dio onargarritasunik testuari?
• Ezberdintasunik ba al da maila estilistikoan, hizkuntzaren zuzentasunean… itzulpenetan eta euskarazko jatorrizko testuetan?
• Irakurleek nola jasotzen dituzte itzulpenak?
• Hutsunerik betetzen al du itzulpenak euskal literatur sisteman? Hala bada, zein?